Polisi Kanda Maalum Ya Jijini Dar es Salaam imewatawanya Kwa Mabomu ya Machozi Wachimba Kokoto Mjimwema Kigamboni

Baadhi ya mawe yaliyoondolewa barabarani baada ya kuwekwa na wachimba kokoto eneo la Maweni, Kigamboni. Watu kadhaa wanaotuhumiwa kufanya vurugu hizo wametiwa mbaroni.

Askari wa Kikosi cha Kutuliza Ghasia (FFU), wakiwa wameweka doria katika barabara kuu ya kutoka Kigamboni kwenda Mji Mwema Dar es Salaam jana, baada ya kudhibiti vurugu za wachimba kokoto wa eneo la Maweni ambao walifunga barabara hiyo kwa mawe kwa zaidi ya masaa natatu na kuchoma matairi wakishinikiza kuruhusiwa kuchimba kokoto.

---

POLISI Kanda Maalum ya Dar es Salaam jana ililazimika kufyatua risasi na kurusha mabomu ya machozi kuwatawanya zaidi ya wakazi 3000 wa Mjimwema, Kigamboni jijini Dar es Salaam, waliofunga barabara kwa zaidi ya saa tatu wakipinga kuondolewa eneo la machimbo kuwapisha wawekezaji. Vurugu hizo zilitokea saa sita mchana baada ya wananchi hao kufunga barabara kupinga hatua ya Serikali kuwazuia kuendelea na shughuli za uchimbaji kokoto katika eneo la Maweni.

Wananchi hao walifunga barabara kwa kuweka mawe, magogo na kuchoma matairi barabarani hali iliyosababisha magari kushindwa kupita na kusababisha maduka kufungwa. Mwenyekiti wa Serikali ya Mtaa wa Mijimwema, Sylivester Roche alisema yeye alifungiwa ofisini na wananchi hao tangu saa 6 mchana na baada ya hapo walikwenda kufunga barabara. “Kama isingekuwa OCD, leo tungekufa maana walikuja wakatufungia nikiwa na wajumbe na mwakilishi kutoka Wilaya ya Temeke,” alisema Roche.

Alisema polisi walifika eneo hilo majira ya mchana ambapo licha ya kuwazuia bado waliendelea kufanya vurugu jambo ambalo liliwalazimu watumia nguvu kuwatawanya. Kamanda wa Polisi Mkoa wa Temeke, David Misime ambaye alikuwepo eneo la tukio alisema walilazimika kutumia nguvu baada ya kuona wananchi hao wamekataa kutii amri.

“Ukishamwona mtu unamuelekeza halafu hataki lazima umshurutishe,” alisema Misime na kuongeza; “Mimi sikuja kupambana na wananchi nimekuja kutatua tatizo ambalo wamelianzisha wenyewe.”

Kamanda huyo alisema hadi sasa wanawashikilia watu kadhaa kwa ajili ya mahojiano na tathimini inafanywa kujua kiwango cha uharibifu wa mali kilichojitokeza kutokana na vurugu hizo.

Alisema pia wataendelea kuwasiliana na viongozi wa wizara husika ili kuona ni taratibu gani zitumike kutatua tatizo hilo ili wananchi hao waendelee na shughuli zao. Mmoja wa wachimbaji hao, Rajabu Zuberi alisema Serikali inatakiwa kuwapa elimu badala ya kutumia nguvu kuwaondoa kwani baadhi yao wamechukua mikopo kwa ajili ya shughuli hizo.

“Miaka yote tunaendesha maisha yetu kwa kutegemea mawe, leo hii wanakuja kutufukuza kama vile sisi ni wakimbizi,” alisema Zuberi. Wachimbaji hao zaidi ya 3,000 walisema wamekuwa wakichimba kokoto katika eneo hilo kwa zaidi ya miaka 20 na kwamba maisha yao yote yanategemea kazi hiyo. “Kula kwetu kusomesha watoto na maisha yetu yote tunategemea machimbo haya hivyo wasituondoe kama wakimbizi,” alisema Maria Masimba.

Mkazi mwingine Cosmas Mateo alisema hivi sasa wamezuiwa kuingia katika eneo hilo na kwamba hata wakisafirisha mizigo yao inakamatwa. Alisema baadhi yao walikuwa na leseni zilizotolewa na Wizara ya Nishati na Madini ambazo walikuwa wakizipata kila mwaka, lakini baadaye zilifutwa. “Serikali iseme ukweli kama imetuchoka….tumepewa stop order (amri) hatufanyi chochote halafu leo hii wanakuja kutuambia tuondoke kwenye machimbo haya,”alisema Mateo.

Wakazi hao pia walilalamikia kitendo cha wawekezaji saba wanaoendelea na shughuli ya kuchimba kokoto katika eneo hilo kwa kile walichodai kuwa hata hao hawana leseni.Mkuu wa Wilaya ya Temeke, Sophia Mjema alisema wao hawana nia ya kuwafukuza wachimbaji hao wanataka kuwapeleka katika maeneo yaliyotengwa kwa shughuli hiyo.

Alisema wachimbaji hao hawana vibali maalum na kwamba tayari walielekezwa na Wizara ya Nishati na Madini kwenda kuomba vibali katika maeneo yaliyotengwa.

“Hawajapewa siku tatu za kuhama…kama kungekuwa na hali hiyo kungekuwa na barua ya kuwajulisha wananchi hao,”alisema Mjema na kuongeza kuwa:“Tunambua kwamba hiyo ndiyo ajira yao hivyo wawe wavumilivu ili tuweze kuangalia namna ya kuwasaidia kwa kuwap