MWILI MENEJA TUME YA UCHAGUZI WAPATIKANA

Ikiwa unatukio Lolote au Habari yoyote usisite kututumia kupitia Barua Pepe blogzamikoa@live.com au Whatsapp namba yetu +255765056399

Imeandikwa na NAIROBI, Kenya

MENEJA wa kitengo cha Teknolojia ya Habari na Mawasiliano (Tehama) wa Tume ya uchaguzi nchini Kenya (IEBC), Chris Musando aliyetoweka mwishoni mwa wiki, amepatikana akiwa amekufa.

Mwili wa Meneja huyo ulipatikana ukiwa umehifadhiwa kwenye chumba kimoja cha kuhifadhi maiti jijini Nairobi. Mawasiliano ya mwisho kutoka kwa Musando aliyafanya siku ya Jumamosi majira ya saa tisa alfajiri kupitia ujumbe wa mfupi aliyoyafanya na mmoja wa wafanyakazi wenzake.

Tukio hilo limetokea ikiwa imebaki wiki moja kabla ya kufanyika uchaguzi mkuu nchini humo, utakaofanyika Agosti 8, mwaka huu. Kwa mujibu wa Polisi, mwili wa Musando pamoja na wa mwanamke ambaye hakutambuliwa, ilipatikana eneo la Kikuyu lililopo jijini Nairobi na kupelekwa katika chumba cha kuhifadhi maiti.

Musando alikuwa akijishughulisha na usambazaji wa vifaa vya eletroniki ambavyo vingetumiwa kutambua wapiga kura na kutangaza matokeo wakati wa uchaguzi. Taarifa zinasema kuwa mwili wa Musando ulipelekwa katika chumba cha kuhifadhi maiti na watu waliojitambulisha kuwa ni Polisi.

Awali jana, Polisi nchini humo waliliona gari la mkuu huyo wa kitengo cha Tehama aina ya Land Rover Discovery ikiwa imeegeshwa pembeni ya barabara inayokwenda kwenye maduka ya Thika na kuivuta hadi katika kituo cha Polisi cha Kasarani. Kamanda wa Polisi jijini Nairobi, Japhet Koome alisema tayari gari hilo limechukuliwa kwa ajili ya kukaguliwa alama za vidole.

Juzi baada ya taarifa kusambaa za kupotea kwa Msando na kutangazwa na Mwenyekiti wa IEBC, Wafula Chebukati, mmoja wa watumiaji wa ukurasa wa Twitter aliweka picha za gari la meneja huyo likiwa limeegeshwa lilipokutwa na Polisi katika eneo la Thika. Familia ya Msando iliripoti tukio la kupotea kwake katika kituo cha polisi cha Embakasi siku ya Jumamosi.

CHANZO HABARI LEO